МЕСТНОЧТИМОЕ ПРАЗДНОВАНИЕ
Месяца февраля в 4-й день
НОВОМУЧЕНИКОВ И ИСПОВЕДНИКОВ
ЗЕМЛИ ПОДМОСКОВНЫЯ
Тропарь, глас 4
Днесь земля Подмосковная ликует радостно,/ прославляющи новомученики и исповедники своя,/ иже, страданий лютых не убоявшеся,/ темничная заключения, тяжкия работы и смерть за Христа претерпеша./ Ныне же, яко чада Божия в Царствии Небеснем торжествующе,/ Троицу Живоначальную прославляют/ и молятся о душах наших.
Кондак, глас 3
Христа Бога всем сердцем возлюбивше,/ веру истиную даже до смерти сохранили есте,/ новомученицы и исповедницы земли Подмосковныя,/ юже, кровьми своими обагривше,/ образ мужества и терпения нам явили есте,/ темже, в Чертозех Небесных пребывающе,/ молитеся мир Отечеству нашему даровати/ и душам нашим велию милость.
Величание
Величаем вас,/ святии новомученицы и исповедницы Подмосковнии,/ и чтим честная страдания ваша,/ яже за Христа/ претерпели есте.
Молитва
О, святии новомученицы и исповедницы земли Подмосковныя: святителие и пастырие, монаси и мирстии, благочестивии мужие и жены, за Христа в Бутове и инех местех пострадавший, верность Ему даже до смерти свидетельствовавший и венец жизни от Него приемшии!
Вы во дни гонения лютаго, Церковь Русскую от безбожных постигшаго, на судищих, в заточениих, горьких работах и всяких скорбных обстояниих образ совершеннаго терпения и твердаго упования на Бога мужественне явили есте. Ныне же, в рай сладости наслаждающеся, Престолу Божию во славе предстоите и присно хвалу со Ангелы и всеми святыми Триединому Богу возносите.
Сего ради мы, недостойнии, молим вас, святии сродницы наши: наставите нас на путь жизни вечныя, укрепите в вере и единомыслии, согрейте сердца наша духом евангельския любве и братолюбия, помозите подвигом добрым подвизатися противу козней диавольских и всякаго греха, научите присно творити волю Божию и хранити заповеди церковныя, да, тако поживше, сподобимся вкупе с вами прославляти в Небеснем Царствии Милостиваго и Человеколюбиваго Бога нашего Отца и Сына и Святаго Духа ныне и присно и во веки веков. Аминь.